لكْلامْ حفى (( الشعر العامي))// الشاعر يزيد علوي اسماعيلي

***  لَــــــكْــــــلَامْ    حْــــــفَــــــى ***

دَاع الدُّا فْ الغُدَّة
نْخَر فْ عْظَام و عَدَّا
تْحدَّى و تْعدَّى و خلاَّ من وْراه جْرَاح

لا صَاحَب ف ْشدَّة
ضَاعْت حْبَال النّجْدَة
و لِّي طَاح فْ حْبَال الضّعف ما يْنَفْعُو تَبْرَاح

ما بْقَى عْسَل فْ شَهدَة
و لا في شَكْوَة زَبْدَة
و الحَوْض لِّي كان سْخِي خْطاه الْمَا و قْسَاح

ما بْقَى ف حْيَا لَذّة
و شَر ّلَمْواج ما يَهْدا
و مَرْكَب الأمّة مدفُوع لاعْبَة به رْياح

الظَّالَم مَا لُو كَبْدَة
لاَحْنَا عْظَم و جَلْدَة
ما سْمَع لْغَانا و لا  مٔعَاه نْفَع صٔيَاح

نَكْدَة وْرَاها نَكٔدَة
لَنْكَاد سْكَنَّا من  مُدَّة
كِي اليُوم كِي غَدَّا مَا بْرَا القَلْب أَوْ ارْتَاح

حْفَى َكْلامْنا  و تْصَدَّى
و الّلْسَان ما قْدَر يَتْصَدَّى
وْ يْلاَ شِي نَابْ دْوَى تْرَاه من جْدَر  جَدْرُو  طَاح

يزيد علوي اسماعيلي